இரண்டாவது ஒருநாள் போட்டியில் தோல்வியடைந்ததற்குப் பிறகு, வெஸ்ட் இண்டீஸ் கேப்டன் ஷாய் ஹோப் பேசியிருக்கிறார்.
இது குறித்து அவர் பேசும்போது”தோல்வியடைந்தாலும் இதில் நேர்மறையான விஷயங்கள் பல உள்ளன. எங்கள் பேட்டிங் வரிசையை எடுத்துக்கொண்டால், நாங்கள் தொடர்ந்து சிறப்பான, போட்டித்தன்மை வாய்ந்த ரன்களைக் குவித்து வருகிறோம். ஆனால் உலகின் மிகச்சிறந்த பேட்டர்களுக்கு எதிராக விளையாடும்போது தவறுகளுக்கான வாய்ப்பு மிகவும் குறைவு; அவர்களுக்கு அப்படி ஒரு தொடக்கத்தைக் கொடுத்தால் மீண்டும் ஆட்டத்திற்குள் வருவது கடினம். அவர்கள் சிறப்பாக விளையாடினார்கள், ஆனால் பந்துவீச்சில் நாங்கள் இன்னும் துல்லியமாக இருந்திருக்க வேண்டும்”
கடந்த போட்டியைப் போல அல்லாமல், இம்முறை நாங்கள் பேட்டிங்கில் நல்ல அஸ்திவாரத்தை அமைத்தோம். கடைசி கட்ட ஓவர்களில் கைவசம் விக்கெட்டுகள் இருக்க வேண்டும் என்பதைப் பற்றித்தான் கடந்த சில நாட்களாக விவாதித்தோம். இங்குள்ள சூழலில் அவர்களின் சுழற்பந்து வீச்சாளர்களே முதன்மை சவாலாக இருப்பார்கள் என்பதை உணர்ந்து, விக்கெட்டைத் தக்கவைத்து ரன் வேகத்தை உயர்த்த திட்டமிட்டோம்”
“வைட்டல் லாவ்ஸுக்குப் பந்துவீச தாமதமானதற்குச் சூழலும் போட்டியின் நிலையும்தான் காரணம். முதன்முறையாக இந்தியாவிற்கு வரும் ஒரு இளம் வீரருக்கு மிகவும் கடினமான ஓவர்களைக் கொடுக்க நாம் விரும்ப மாட்டோம். அவர் இங்கு விளையாடும் போது சௌகரியமாக உணர்வதை உறுதி செய்ய நினைத்தோம்.
அவர் மிகவும் இளையவர் என்றாலும், பொறுப்பை ஏற்று வந்து மிகச் சிறப்பாகப் பந்துவீசினார். கற்றுக்கொள்ள வேண்டிய விஷயங்கள் நிறைய இருந்தாலும், அவர் தொடர்ந்து வலுவாக மீண்டு வருவார் என்ற நம்பிக்கை எனக்கு இருக்கிறது.” என்று கூறியிருக்கிறார்.
