இந்திய வெஸ்ட் இண்டீஸ் அணிகளுக்கு இடையே நடைபெற்ற வரும் ஐந்து போட்டிகள் கொண்ட டி20 தொடரின் மூன்றாவது போட்டி இன்று கயானா மைதானத்தில் நடைபெற்று வருகிறது!
முதல் இரண்டு போட்டிகளில் வென்று இருந்த வெஸ்ட் இண்டீஸ் அணி இன்றைய போட்டிக்கான டாஸிலும் வென்று மிகத் தைரியமாக முதலில் பேட்டிங் செய்வது என தீர்மானித்தது.
இந்த முறை வெஸ்ட் இண்டீஸ் துவக்க ஆட்டக்காரர்கள் இருவரும் அணிக்கு முதல் விக்கெட்டுக்கு 55 ரன் பார்ட்னர்ஷிப் தந்தார்கள். கையில் மேயர்ஸ் 25(20), சார்லஸ் 12(14) ரன்கள் எடுத்தார்கள்.
இதற்கு அடுத்து ஆபத்தான நிக்கோலஸ் பூரன், பிரண்டன் கிங் உடன் ஜோடி சேர்ந்தார். குல்தீப் வீசிய ஒரு ஓவரில், ஒரு பிரம்மாண்ட சிக்ஸர் மற்றும் ஒரு பிரம்மாண்ட பவுண்டரி அடித்து அசத்தினார். இன்னொரு முனையில் கிங்கும் அதிரடிக்கு இறங்க முற்பட்டார்.
இந்த நிலையில் சார்லஸை வீழ்த்தி இருந்த குல்தீப் யாதவ், தன்னுடைய கடைசி ஓவரை வீச வந்தார். அந்த ஓவரில் நிக்கோலஸ் பூரன் கிரீஸ் விட்டு இறங்கி வந்து அடிக்க முயல, சஞ்சு சம்சனால் 12 பந்துகளில் 20 ரன்களுக்கு ஸ்டம்பிங் செய்யப்பட்டார். இதை அடுத்து அதே ஓவரில் பிரன்டன் கிங்கை 42 பந்துகளுக்கு 42 ரன்களில் தானே கேட்ச் பிடித்து வெளியேற்றினார் குல்தீப் யாதவ்.
அடுத்து வந்த கேப்டன் ரோமன் பவல் அதிரடியாக விளையாடி 19 பந்துகளில் மூன்று சிக்சர் மற்றும் ஒரு பவுண்டரி உடன் 40 ரன்கள் ஆட்டம் இழக்காமல் சேர்க்க நிர்ணயிக்கப்பட்ட 20 ஓவர்களில் வெஸ்ட் இண்டீஸ் அணி ஐந்து விக்கட்டுகள் இழப்புக்கு 159 ரன்கள் சேர்த்தது.
இந்தப் போட்டியில் நான்கு ஓவர்கள் பந்து வீசி 28 ரன்கள் விட்டுத்தந்து மூன்று விக்கட்டுகளை கைப்பற்றியதின் மூலம் குல்தீப் யாதவ், சர்வதேச டி20 கிரிக்கெட்டில் அதிவேகமாக 50 விக்கட்டுகளை கைப்பற்றிய இரண்டாவது பந்துவீச்சாளர், அதிவேகமாக 50 விக்கெட்டுகளை கைப்பற்றிய முதல் இந்திய பந்துவீச்சாளர் இன்று இரு சாதனைகளைப் படைத்தார்.
சர்வதேச டி20 கிரிக்கெட்டில் அதிவேகமாக 50 விக்கெட்டுகளை கைப்பற்றியவர்கள்:
அஜந்தா மெண்டிஸ் 26 போட்டிகள்
குல்தீப் யாதவ் 29 போட்டிகள்
வனிந்து ஹசரங்கா 30 போட்டிகள்
இம்ரான் தாஹிர் 31 போட்டிகள்
ரஷீத் கான் 31 போட்டிகள்
லுங்கி நிகிடி 32 போட்டிகள்
சர்வதேச டி20 கிரிக்கெட்டில் அதிவேகமாக 50 விக்கட்டுகளை கைப்பற்றிய இந்திய பந்துவீச்சாளர்கள்:
29 – குல்தீப்
34- சாஹல்
41 – பும்ரா
42- அஸ்வின்
50- புவி
57 – ஹர்திக்
60 – ஜடேஜா
