ஐபில் தொடரின் முதல் போட்டியில் ஏற்பட்ட காயத்தினால், இந்த வருடம் நடைபெற உள்ள 50-ஓவர் உலகக் கோப்பையையும் கேன் வில்லியம்சன் தவறவிடுவார் எனும் அதிர்ச்சி தகவல் வெளியாகியுள்ளது.
ஐபிஎல் தொடரின் 16வது சீசன் கடந்த மார்ச் 31ஆம் தேதி அகமதாபாத்தில் உள்ள நரேந்திர மோடி மைதானத்தில் துவங்கியது. சென்னை சூப்பர் கிங்ஸ் மற்றும் குஜராத் டைட்டன்ஸ் அணிகள் துவக்க போட்டியில் விளையாடின.
போட்டியின் போது பவுண்டரில் நின்று பந்தை தடுக்க முயற்சித்த கேன் வில்லியம்சன் மூட்டு பகுதியில் பலமான காயம் ஏற்பட்டது. மருத்துவர்கள் தோள்பட்டையில் தாங்கியபடி வெளியே அழைத்துச் செல்லும் அளவிற்கு மோசமாகவும் அடிபட்டிருந்தது.
உடனடியாக ஸ்கேன் செய்ய அழைத்துச் செல்லப்பட்டு சிகிச்சையும் பெற்று வந்தார் கேன் வில்லியம்சன். இரு தினங்களுக்கு பிறகு வெளிவந்த ஸ்கேன் ரிப்போர்ட்டில் கேன் வில்லியம்சன் குணமடைய எவ்வளவு காலம் ஆகலாம் என்று இப்போது ஏதும் சொல்ல இயலாது என மருத்துவர்கள் தெரிவித்தனர்.
இதனையடுத்து ஐபிஎல் தொடரிலிருந்து மொத்தமாக விலகி, உருக்கமாக பேசிய பிறகு நியூசிலாந்து திரும்பினார் கேன் வில்லியம்சன். அங்கு சென்ற பிறகும் காயத்தின் தீவிரம் குறையவில்லை.
மீண்டும் மருத்துவர்களிடம் பரிசோதித்துப் பார்க்கையில், இவரது காயத்திற்கு அறுவை சிகிச்சை மட்டுமே தீர்வு என்பது உறுதியானது. அறுவைசிகிச்சை செய்து கொண்டால் குறைந்தது 6 முதல் 8 மாத காலம் கிரிக்கெட் போட்டிகளில் விளையாட முடியாது என்பதும் அதிர்ச்சிகரமாக தெரிவிக்கப்பட்டுள்ளது.
அறுவை சிகிச்சை செய்து கொண்டால் கேன் வில்லியம்சன் இந்த வருட 50 ஓவர் உலகக்கோப்பையில் இடம்பெற முடியாது எனும் கூடுதல் அதிர்ச்சி தகவலும் தெரிவிக்கப்பட்டு இருக்கிறது.
கடந்த 2019 ஆம் ஆண்டு நடைபெற்ற 50 ஓவர் உலகக் கோப்பையின் இறுதிப்போட்டி வரை சென்ற நியூசிலாந்து அணி, துரதிஷ்டவசமாக, சூப்பர் ஓவரில்(அதிக பவுண்டரி கணக்குகள் அடிப்படையில்) இங்கிலாந்து அணியிடம் தோல்வியை தழுவியது.
இருப்பினும் அந்த உலகக்கோப்பை தொடரில் தொடர் நாயகன் விருதை பெற்றிருந்தார் கேன் வில்லியம்சன். இப்படிப்பட்ட சிறந்த வீரர் அணியில் இருக்கமாட்டார் என்பது நியூசிலாந்து அணிக்கு பெருத்த இடியாகவே இருக்கும்.
இந்த அறுவை சிகிச்சை மூலம் கேன் வில்லியம்சனின் கிரிக்கெட் வாழ்க்கை மொத்தமாக முடிந்து விடலாம் என்றும் கருதப்படுகிறது. ஏனெனில் நியூசிலாந்து அணியின் வருடாந்திர ஒப்பந்தத்தில் கேன் வில்லியம்சன் இல்லை.
அணியின் மூத்த வீரர் என்கிற அடிப்படையில் முன்னணி தொடர்களில் விளையாடி வந்தார். இந்த வருட உலகக்கோப்பைக்கு பிறகு வருடாந்திர ஒப்பந்தத்தில் இல்லாத வீரர்களுக்கு முக்கியமான தொடர்களில் இடம் கொடுக்கப்பட மாட்டாது எனும் தகவலும் கூறப்பட்டு வருகிறது. அதன் அடிப்படையில், இனி கேன் வில்லியம்சன் சர்வதேச போட்டிகளுக்கு எடுக்கப்படாமல் போவதற்கும் அநேக வாய்ப்புகள் இருக்கிறது.
