ஜெய்ஸ்வால் என்ன தவறு செய்தார்? இந்திய அணியில் ஏன் சேர்க்கவில்லை.. வெங்சர்கார் கேள்வி

2024 டி20 உலகக் கோப்பையை வென்ற இந்திய அணியில் இடம்பிடித்த யாஷஸ்வி ஜெய்ஸ்வால், 2026 டி20 உலகக் கோப்பைக்கான அணியில் தேர்வு செய்யப்படவில்லை. மூன்று சர்வதேச வடிவ கிரிக்கெட்டிலும் சதம் அடித்த ஆறு இந்திய பேட்ஸ்மேன்களில் இவரும் ஒருவர்.
ஜூலை 2023-ல் மேற்கிந்தியத் தீவுகளுக்கு எதிரான டெஸ்ட் போட்டியில் சர்வதேச அரங்கில் அறிமுகமான ஜெய்ஸ்வால், அதற்குப் பிறகு இந்தியாவின் அனைத்து டெஸ்ட் போட்டிகளிலும் தொடர்ந்து விளையாடி வருகிறார்.

இவ்வளவு சிறந்த சாதனைகள் இருந்தும், பிசிசிஐயின் தேர்வுக் குழு அவரை 2026 டி20 உலகக் கோப்பை அணியில் சேர்க்கவில்லை. ஷுப்மன் கில்லை அணியில் இருந்து நீக்கிவிட்டு, இஷான் கிஷன் சேர்க்கப்பட்டார். ஆனால், ஜெய்ஸ்வாலுக்கு வாய்ப்பு வழங்கப்படவில்லை. இந்த முடிவு பலரது புருவங்களையும் உயர்த்தியுள்ளது.

துரதிர்ஷ்டவசமானது

இது குறித்து இந்திய அணியின் முன்னாள் கேப்டன் திலிப் வெங்கசர்க்கர் மிகுந்த ஏமாற்றத்தை வெளிப்படுத்தினார். “எந்தத் தவறும் செய்யாத யாஷஸ்வி தொடர்ந்து அணியில் இருந்து புறக்கணிக்கப்படுவது துரதிர்ஷ்டவசமானது. அவர் அனைத்து வடிவப் போட்டிகளிலும் அபாரமான ஃபார்மில் உள்ளார். அணிக்குள் வர அவர் வேறு என்ன செய்ய வேண்டும் என்று எனக்குத் தெரியவில்லை” தெரிவித்தார்.

ஜெய்ஸ்வால் கடைசியாக ஜூலை 2024-ல் இலங்கைக்கு எதிராக டி20 போட்டிகளில் விளையாடினார். அதன் பிறகு, இந்திய அணி டெஸ்ட் கிரிக்கெட்டிற்கு முன்னுரிமை அளித்தது. துவக்க வீரராக அவரது கடைசி ஐந்து டி20 சர்வதேச ஸ்கோர்கள் 93, 12, 40, 30, 10 ஆகும். கிட்டத்தட்ட 200 ஸ்ட்ரைக் ரேட்டுடன் இருந்தது.

முடிவை ஏற்கிறேன்:

“ஒரு போட்டியின் போக்கையே மாற்றும் வீரரை அணியில் இருந்து வெளியேற்றக்கூடாது,” என்று வெங்கசர்க்கர் கூறினார். ஆயினும், ஷுப்மன் கில்லை அணியில் இருந்து நீக்கிய தற்போதைய தேர்வுக் குழுவின் முடிவை வெங்கசர்க்கர் வரவேற்றார். அனைவரும் சிறந்த வீரர்கள் என்றாலும், நான் தேர்வுக் குழுவுடன் இருக்கிறேன் என்று அவர் தெரிவித்தார்.

இதை படிங்க: விக்னேஷ் புத்தூர் புதிய உலக சாதனை.. லிஸ்ட் ஏ கிரிக்கெட்டில் ஜாண்டி ரோட்ஸ் ரெக்கார்டை முறியடித்தார்

ஆனால், கில்லுக்குப் பதிலாக யாரைத் தேர்ந்தெடுத்திருப்பீர்கள் என்று கேட்டபோது, தனது முதல் தேர்வு ஜெய்ஸ்வால் தான் என்று வெங்கசர்க்கர் தெளிவுபடுத்தினார். “அவர் பலமுறை ஒரு சிறந்த தரமான வீரர் என்பதை நிரூபித்துள்ளார். மேலும், தற்போதைய காலத்திற்குத் தேவையான துவக்கத்தை எப்போதுமே அணிக்கு வழங்கியுள்ளார்” என்றும் வெங்கசர்க்கர் சுட்டிக்காட்டினார்.