2025 ஆசிய கோப்பை இறுதிப்போட்டியில் பாகிஸ்தானுக்கு எதிராக துபாயில் நிலவிய அழுத்தமான சூழ்நிலை குறித்து நட்சத்திர வீரர் திலக் வர்மா பேசினார். ஒரு கட்டத்தில் பாகிஸ்தான் முன்னிலை வகித்தபோது, அவர்கள் தன்னை சீண்ட முயற்சித்ததாக கூறியுள்ளார்.22 வயதான திலக் வர்மா தனது வாழ்க்கையின் சிறந்த இன்னிங்ஸ்களில் ஒன்றை ஆடி, இந்தியாவை வெற்றிக்கு வழிநடத்தினார்.
20/3 என்ற நிலையில் களமிறங்கிய திலக், 53 பந்துகளில் 69 ரன்கள் எடுத்து அசத்தினார். சஞ்சு சாம்சனுடனும், ஷிவம் துபேவுடனும் முக்கிய கூட்டணி அமைத்து, இந்தியாவை ஐந்து விக்கெட் வித்தியாசத்தில் வெற்றி பெற வைத்தார்.ஹைதராபாத்தில் செய்தியாளர்களிடம் பேசிய திலக், இறுதி போட்டியில் அழுத்தம் இருந்ததாலும், பாகிஸ்தான் இந்தியாவுக்கு ஈடாக இல்லை என்று கூறினார்.
இது குறித்து பேசிய அவர், “கேப்டன் சூர்யகுமார் யாதவ் கூறியதை நான் ஒப்புக்கொள்கிறேன். எங்களுக்கு எந்தவித போட்டியும் இல்லை. பாகிஸ்தான் எங்களுக்கு ஈடாக இல்லை. ஆனால் ஒவ்வொரு எதிரணியும் வெவ்வேறு திட்டங்களுடன் வருகிறது. பாகிஸ்தானும் அதைச் செய்தது.”
என்னை சீண்டினர்:
” நான் பேட் செய்ய களமிறங்கியபோது அழுத்தம் இருந்தது. பதற்றமும் இருந்தது. என் மனதில் பல விஷயங்கள் ஓடின. ஆனால் அழுத்தத்தின் கீழ், நான் என் நாட்டைப் பற்றி மட்டுமே சிந்தித்தேன், 140 கோடி இந்தியர்களுக்காக வெற்றி பெற விரும்பினேன். இந்தியா மூன்று விக்கெட்டுகளை இழந்து அழுத்தத்தில் இருந்தபோது, பாகிஸ்தான் வீரர்கள் என்னை சீண்ட முயற்சித்தனர்.”
“ஆனால் நான் அவசரத்தில் எந்த மோசமான ஷாட்டையும் ஆடாமல், அமைதியாக இருக்க முயற்சித்தேன். முன்பு கூறியது போல, அடிப்படைகளைப் பின்பற்றினேன், அவர்களுக்கு பதிலளிக்கவில்லை. போட்டிக்குப் பிறகு அவர்களுக்கு பதிலளிக்க முடிவு செய்தேன். அவர்கள் என்னை பலவாறு திசைதிருப்ப முயற்சித்தனர். இந்தியா பாகிஸ்தான் போட்டிகளில் இது பெரும்பாலும் நடக்கிறது. கேமரா முன்பு என்ன நடந்தது என்று சரியாக சொல்ல முடியாது.”
“என் பதற்றத்தை உணர முடிந்தது. ஆனால் எப்போதும் நாட்டை மனதில் வைத்திருந்தேன். நாடு எல்லாவற்றையும் விட பெரியது. நான் என் நாட்டுக்காக உயிரைக் கொடுக்கத் தயாராக இருந்தேன். அதுதான் என் மனதில் ஓடியது. 1.4 பில்லியன் மக்களுக்காக விளையாடுகிறேன் என்பதால் அமைதியாக இருக்க வேண்டியிருந்தது.”
உலககோப்பை தான் இலக்கு:
“அவர்களை ஏமாற்ற முடியாது. என் சிறுவயதில் கற்ற அனைத்து அடிப்படைகளும் எனக்கு உதவின. ஆசிய கோப்பையில் இந்தியாவின் வெற்றிக்கு பங்களித்ததில் மகிழ்ச்சி அடைகிறேன். ஆனால் என் பெரிய இலக்கு உலகக் கோப்பை. 2011 உலகக் கோப்பையை பார்க்கும்போது கிரிக்கெட்டை விரும்பத் தொடங்கினேன். அதன்பிறகு தொழில்முறை கிரிக்கெட்டை தொடங்கினேன். அடுத்த ஆண்டு உலகக் கோப்பையில் பங்கேற்று இந்தியாவை வெற்றி பெற வைக்க விரும்புகிறேன். அதுதான் என் இறுதி இலக்கு.”
இதையும் படிங்க: ஆசிய கோப்பை நடந்த விதம் அவமானம் ஆனது.. இப்படி செய்யாதீங்க – இந்திய முன்னாள் வீரர் வருத்தம்
“இது என் சிறந்த இன்னிங்ஸ்களில் ஒன்று. சென்னையில் இங்கிலாந்துக்கு எதிராக ஆடிய இன்னிங்ஸையும் நான் உயர்வாக மதிப்பிடுகிறேன். ஆனால் ஆசியக் கோப்பையில், அதுவும் பாகிஸ்தானுக்கு எதிராக அழுத்தத்தின் கீழ் ஆடியது, சிறந்த உணர்வு. எனவே, என் இரண்டு சதங்களை விட இதை என் சிறந்த இன்னிங்ஸாக மதிப்பிடுகிறேன். இது நான் உணர்ந்த மிகச்சிறந்த உணர்வு. அழுத்தத்தின் கீழ் அமைதியாக இருந்து, வெற்றி பெறுவேன் என்று தெரிந்திருந்தேன். என் நாட்டை நினைத்து, ஒரு பந்து ஒரு பந்தாக கவனம் செலுத்தினேன். நான் என்னை நம்பினேன், என் நாட்டுக்காக இதைச் செய்தேன், அதற்காக பெருமைப்படுகிறேன்.” என்று திலக் வர்மா கூறினார்.
