நேற்று நடைபெற்ற ஆட்டத்தில் தொடக்கத்திலேயே விக்கெட்டுகளை இழந்து தடுமாறிய நிலையில், அணியின் சிறப்பான பார்ட்னர்ஷிப் மற்றும் வீரர்களின் அதிரடி ஆட்டத்தால் பெற்ற வெற்றி குறித்து வெஸ்ட் இண்டீஸ் அணியின் கேப்டன் ஷாய் ஹோப் மிக முக்கியக் கருத்துக்களைப் பகிர்ந்துள்ளார்.
இந்தியாவில் நடைபெறும் போட்டிகளில் சேசிங் செய்யும்போது எப்போதும் வெற்றி பெற வாய்ப்பு இருக்கும் என்ற நம்பிக்கை தங்களுக்குள் இருந்ததாக அவர் தெரிவித்துள்ளார். தொடக்கத்தில் பின்னடைவைச் சந்தித்தாலும், நிலையை உணர்ந்து விக்கெட்டுகளைக் காத்து விளையாடியது அணியின் வெற்றிக்கு முக்கியக் காரணமாக அமைந்தது.
இதுகுறித்து ஷாய் ஹோப் பேசும்போது “ஆரம்பத்தில் 5 ரன்களுக்கு 2 விக்கெட்டுகள் என்ற நிலை வந்தபோது, இது கண்டிப்பாக ஒரு கடினமான சேசிங்காக இருக்கப்போகிறது என்றுதான் நினைத்தேன். ஆனால் இந்தியாவில் சேஸ் செய்யும்போது எப்போதுமே உங்களுக்கு ஒரு வாய்ப்பு உண்டு. ஸ்கோர்போர்டில் என்ன இலக்கு இருந்தாலும் நாம் ஆட்டத்தில் தான் இருக்கிறோம் என்று எப்போதும் நினைக்கலாம், இருப்பினும் 5 ரன்களுக்கு 2 விக்கெட்டுகள் என்பது சவாலானது” என்று கூறினார்.
தொடர்ந்து பேசிய அவர் “எனக்கும் ரோவ்மேனுக்கும் இடையே அந்த பார்ட்னர்ஷிப் அமைந்தபோது, எங்கள் இன்னிங்ஸுக்கு ஒரு வேகம் கிடைத்தது. அதன்பிறகு ஷெர்ஃபேன் உள்ளே வந்து அற்புதமாக பேட்டிங் செய்தார். இன்று நாங்கள் வெற்றி கோட்டைத் தாண்டுவதற்குத் தேவையான அந்த உந்துதலை அவர் தனது ஆட்டத்தின் மூலம் எங்களுக்குக் கொடுத்தார்” என்று தெரிவித்தார்.
மேலும் அவர் பேசுகையில் “கிரிக்கெட்டில் நாம் பார்ட்னர்ஷிப்களில் இன்னும் சிறப்பாக பேட்டிங் செய்ய வேண்டும் என்பதை நான் உறுதியாக நம்புகிறேன். அது எங்களது ஆட்டத்தில் அவ்வப்போது குறைகின்ற ஒரு விஷயமாகும். ஆனால் சில நேரங்களில் நீங்கள் அமைதியாக உட்கார்ந்து உங்கள் பார்ட்னர் ஷாட்கள் அடிப்பதைப் பார்க்க வேண்டும். அந்தச் சூழ்நிலையில், ஆட்டத்தின் தேவைக்கேற்ப ரன் ரேட்டை நாம் சரியாகக் கொண்டுசெல்லும் வரை, நான் தேவையில்லாத ரிஸ்க் எதுவும் எடுக்கத் தேவையில்லை. நாங்கள் மிகச் சிறப்பாகச் சென்றுகொண்டிருந்தோம், எனவே இந்த சேசிங்கை முடிந்தவரை சரியாகக் கணக்கிட்டு விளையாடுவது மட்டுமே எங்கள் நோக்கமாக இருந்தது” என்று கூறி முடித்தார்.