இந்திய அணியின் வளர்ந்து வரும் இளம் ஆல்-ரவுண்டரான நிதிஷ் குமார் ரெட்டி தனது முழு திறமைக்கும் ஏற்றவாறு இன்னும் சிறப்பாக விளையாட வேண்டும் என்று முன்னாள் இந்தியப் பயிற்சியாளர்கள் கருத்து தெரிவித்துள்ளனர். ஹர்திக் பாண்டியாவுக்கு மாற்றாகக் கருதப்படும் நிதிஷ் ரெட்டி, சர்வதேச கிரிக்கெட்டில் இன்னும் தனது பேட்டிங் மற்றும் பந்துவீச்சு திறன்களை முழுமையாக வெளிப்படுத்த வேண்டும் என்று கிரிக்கெட் வட்டாரங்களில் விவாதிக்கப்பட்டு வருகிறது.
ஹர்திக் பாண்டியாவின் காயங்கள் மற்றும் பணிச்சுமை காரணமாக இந்திய அணியில் இடம் பெற்றுள்ள நிதிஷ் ரெட்டி, எதிர்கால உலகக் கோப்பை போட்டிகளுக்காகத் தயார்படுத்தப்பட்டு வருகிறார். சர்வதேச அளவில் அவருக்குப் போதுமான வேகம் மற்றும் திறமை இருந்தாலும், நெருக்கடியான சூழ்நிலைகளில் பந்துவீச்சு மற்றும் பேட்டிங்கில் தனது திட்டங்களைச் சரியாகச் செயல்படுத்துவதில்தான் வெற்றியோ தோல்வியோ அடங்கியுள்ளது என்று வல்லுநர்கள் சுட்டிக்காட்டுகின்றன.
இதுகுறித்து முன்னாள் இந்திய ஃபீல்டிங் பயிற்சியாளர் ஆர். ஸ்ரீதர் பேசும்போது, “நிதிஷ் ரெட்டி தற்போது தனது முழு திறமைக்கும் சற்று குறைவாகவே விளையாடி வருகிறார் என்று நான் நினைக்கிறேன். அவர் இன்னும் அதிகமான ரன்களைக் குவிப்பார் என்றும், பேட்டிங்கில் இன்னும் சிறப்பாகச் செயல்படுவார் என்றும் நம்புகிறேன். அவர் திறமையான ஒரு பேட்டர்” என்று கூறியுள்ளார்.
அதேபோல் மற்றொரு முன்னாள் பயிற்சியாளர் பாரத் அருண் பேசும்போது, “ஹர்திக் பாண்டியா ஒரு சிறந்த ஆல்-ரவுண்டர், அவர் அணியில் இல்லாதது நிச்சயம் ஒரு இழப்புதான். ஆனால் நிதிஷ் குமார் ரெட்டி வடிவத்தில் நமக்கு மற்றொரு நல்ல ஆல்-ரவுண்டர் கிடைத்துள்ளார். சர்வதேச அளவில் பந்துவீசத் தேவையான வேகம் அவரிடம் உள்ளது. இருப்பினும், உங்களது வேகத்தை விட நீங்கள் எதைச் சாதிக்க நினைக்கிறீர்கள் என்பதைச் சரியாக எக்ஸிகியூட் செய்வதுதான் மிகவும் சவாலானது. கடினமான சூழ்நிலைகளிலும், பிரஷர் சமயங்களிலும் நீங்கள் திட்டமிட்டபடி பந்துவீசி செயல்பட்டால் மட்டுமே வெற்றி பெற முடியும்” என்று தெரிவித்துள்ளார்.
