இலங்கை அணிக்கு எதிரான இரண்டாவது டெஸ்ட் போட்டி பரபரப்பாக நடைபெற்று சமனில் முடிந்த நிலையில், போட்டிக்குப் பிறகு இந்திய அணியின் கேப்டன் ஷுப்மன் கில் அணியின் செயல்பாடு, ஃபாலோ-ஆன் முடிவு, இளம் வீரர்களின் வளர்ச்சி மற்றும் வருங்கால தொடர்கள் குறித்து விரிவாகப் பேசியுள்ளார்.
இந்த போட்டியில் இந்திய அணி 503 ரன்கள் குவித்து டிக்ளேர் செய்ததுடன், இலங்கை அணியை ஃபாலோ-ஆன் செய்ய வைத்தது. இருப்பினும் இலங்கை பேட்டர்கள் அபாரமாகப் போராடி 429 ரன்கள் எடுத்து போட்டியை டிரா செய்தனர். தொடரை 1-0 என்ற கணக்கில் இந்தியா கைப்பற்றிய நிலையிலும், இந்த போட்டியின் விறுவிறுப்பு அனைவரையும் கவர்ந்தது.
இதுகுறித்து இந்திய கேப்டன் ஷுப்மன் கில் பேசும்போது “நாங்கள் தொடர்ந்து மூன்று நாட்களாக சுமார் 250 ஓவர்கள் ஃபீல்டிங் செய்து எங்களால் முடிந்த அனைத்து முயற்சிகளையும் செய்தோம். எதிரணி பேட்டர்கள் உண்மையிலேயே மிகச் சிறப்பாக விளையாடினார்கள். இந்த போட்டியில் வேறு விதமாக எதையாவது செய்திருக்க முடியுமா என்றால் நிச்சயமாக இல்லை. இலங்கை அணியினர் மிகுந்த பிரஷரில் இருந்தபோதும் மீண்டு வந்த விதம் பாராட்டுக்குரியது. கடைசியில் இன்று டெஸ்ட் கிரிக்கெட் தான் வெற்றி பெற்றுள்ளது” என்று கூறி இருக்கிறார்.
தொடர்ந்து இளம் வீரர்கள் மற்றும் அணி குறித்துப் பேசிய கில் “இந்த தொடரில் தேவ்தத் படிக்கல், கே எல் ராகுல், மானவ் சுதர் மற்றும் பிரசித் கிருஷ்ணா ஆகியோரின் செயல்பாடு எங்களுக்கு நிறைய பாசிட்டிவ் விஷயங்களை கொடுத்துள்ளது. குறிப்பாக மானவ் சுதர் மணிக்கட்டைப் பயன்படுத்தி பந்தை ரிலீஸ் செய்யும் விதம் அருமையாக உள்ளது. வருங்காலத்தில் அவர் இந்திய அணிக்கு மிக முக்கிய பவுலராக இருப்பார்” என்று கூறி இருக்கிறார்.
மேலும் ஃபாலோ-ஆன் முடிவு மற்றும் உலக டெஸ்ட் சாம்பியன்ஷிப் பற்றிப் பேசும்போது “ஐந்தாம் நாள் வானிலை எப்படி இருக்கும் என்று தெரியாததால் தான் ஃபாலோ-ஆன் கொடுத்தோம். போட்டி முடிந்த பிறகு தான் அந்த முடிவு சரியா தவறா என்று யோசிக்க முடியும். அடுத்து நவம்பரில் நியூசிலாந்து தொடர் வரவுள்ளது. அதில் சிறப்பாக செயல்பட்டு வேர்ல்ட் டெஸ்ட் சேம்பியன்ஷிப் ஃபைனல் போட்டிக்கு முன்னேறுவோம் என்ற நம்பிக்கை உள்ளது” என்று கூறி இருக்கிறார்.
