சுப்மன் கில்லை கேப்டனாக நியமித்தது பயிற்சியாளரின் முடிவு அல்ல, மாறாக தேர்வாளர்களின் முடிவாக இருக்கும் என்று சஞ்சய் பங்கர் தெரிவித்துள்ளார். பயிற்சியாளர் கம்பீர் அணிக்கு ஏற்ப தன்னை மாற்றிக்கொள்ள வேண்டும் என்று அவர் கூறினார்.
ரோஹித் ஷர்மா ஆஸ்திரேலியாவில் நடைபெறும் ஒருநாள் தொடரில் கேப்டனாக இருப்பார் என ரசிகர்களும் முன்னாள் கிரிக்கெட் வீரர்களும் எதிர்பார்த்த நிலையில், தேர்வாளர்கள் ஆச்சரியமாக கில்லை கேப்டனாக நியமித்தனர். இந்த முடிவை நியாயப்படுத்திய தலைமை தேர்வாளர் அஜித் அகர்கர், 2027 உலகக் கோப்பைக்கு 26 வயதான கில்லுக்கு நேரம் கொடுக்க விரும்புவதாக கூறினார்.
தேர்வுக்குழுவினர் எடுத்த முடிவு:
இது குறித்து பேசிய சஞ்சய் பங்கர், “எனக்குத் தெரிந்தவரை, இது பயிற்சியாளரின் முடிவாக இருக்க முடியாது. பயிற்சியாளர் தனக்கு கிடைத்த அணியுடன் பணியாற்ற வேண்டும். இது பயிற்சியாளரின் வசதியைப் பற்றியது அல்ல. பயிற்சியாளர் அணிக்கு ஏற்ப மாற்றிக்கொள்ள வேண்டும்.”
“கிரிக்கெட்டில் இப்படித்தான் நடக்கிறது. சுப்மன் கில் ஒரு மிகச் சிறந்த பேட்ஸ்மேன். அவருக்கு வயது ஆதரவாக உள்ளது மற்றும் 5, 6 ஆண்டுகள் சர்வதேச கிரிக்கெட் அனுபவம் உள்ளது. எனவே, இது தேர்வாளர்களின் முடிவு என்று நினைக்கிறேன்.”
பயிற்சியாளர் பணி கிடையாது:
“இது முற்றிலும் நியாயமான முடிவு. பயிற்சியாளர் கவுதம் கம்பீர் தனது பேட்டியில், மக்கள் என்னைப் பற்றியும் யோசிக்க வேண்டும் என்று குறிப்பிட்டார். நாம் எப்போதும் அணி என்பது கேப்டனுடையது என்று நினைத்திருக்கிறோம். ஆனால் இப்போது பயிற்சியாளர்கள் செய்யும் பணி, பின்னணியில் உள்ள முயற்சிகள் ஆகியவற்றைப் பார்க்கையில், வெவ்வேறு தத்துவங்கள் கொண்ட கேப்டன்களுடன் பணியாற்றுவது எளிதல்ல.”
இதையும் படிங்க: முதல் ஒருநாள் போட்டியில் தோல்வி.. காரணத்தை வெளிப்படையாக சொன்ன கில்.. வெற்றி குறித்து மிட்செல் மார்ஷ் விளக்கம்
“குறிப்பாக அவர்கள் ஒன்றாக பயணிக்காதபோது. சுப்மன் கில் அனைத்து வகை கிரிக்கெட்டிலும் அணியுடன் பயணிக்கும் ஒரு வீரர். திட்டமிடுவதும், தொடர்ந்து தொடர்பு கொள்வதும் எளிதல்ல. கவுதம் கம்பீர் மூன்று கேப்டன்களுக்கு பதிலாக இரண்டு கேப்டன்கள் மட்டுமே தேவை என்று கூறியதை நான் ஆதரிக்கிறேன்.” என்று சஞ்சய் பங்கர் கூறினார்.கில் தனது ஒருநாள் கேப்டன்சி பயணத்தை ஞாயிற்றுக்கிழமை பெர்த்தில் ஆஸ்திரேலியாவுக்கு எதிராக ஏழு விக்கெட் தோல்வியுடன் தொடங்கினார்.
