சமீபத்தில் நடைபெற்ற போட்டியில் இந்திய அணிக்கு எதிராக சேஸிங் செய்து வெற்றி பெற்றது மற்றும் தொடரை சிறப்பாக முடித்தது குறித்து வெஸ்ட் இண்டீஸ் கேப்டன் சாய் ஹோப் கருத்து தெரிவித்துள்ளார்.
இந்தியாவில் விளையாடும் போது பனிப்பொழிவு காரணமாக சேஸிங் செய்வது எளிது என்பதால், இந்தத் தொடரை வெற்றியோடு முடிக்க வெஸ்ட் இண்டீஸ் அணி திட்டமிட்டு சிறப்பாகச் செயல்பட்டதாகக் கருதப்படுகிறது.
இதுகுறித்து சாய் ஹோப் பேசும்போது “ஆம், இந்தியாவில் விளையாடும் போது, குறிப்பாக பனிப்பொழிவு வரும் வேளையில் சேஸிங் செய்வது எப்போதும் மிகவும் எளிது. ஆனால் நாங்கள் இந்த தொடரை ஒரு வலுவான வெற்றியுடன் முடிக்க விரும்பினோம், அதனால் எங்கள் வீரர்கள் இன்று வெற்றி கோட்டைத் தொட்டது எனக்கு மிகவும் மகிழ்ச்சி அளிக்கிறது. எனக்கு போட்டியில் சுமார் 30 ஓவர்கள் முடிந்த போது, தொடை இடுக்கு பகுதியில் லேசான அசௌகரியம் இருப்பது போல் இருந்தது. அதனால் கடைசி வரை போராட மட்டுமே முயற்சி செய்தேன்” என்று கூறி இருக்கிறார்.
தொடர்ந்து பேசிய அவர் “முதலாவதாக, எங்கள் அணியில் ஒரு பேட்டர் குறைவாக இருந்தார், விடெல் லாஸையும் சேர்த்துக் கொண்டால் இரண்டு பேட்டர்கள் இல்லை. அதனால் இது எப்போதும் ஒரு சவாலாகத்தான் இருக்கும். மேலும் சிறந்த மனிதரான எம்.எஸ்.தோனியுடன் நான் பேசிய அந்த சிறந்த உரையாடலில், ‘நீங்கள் நினைப்பதை விட எப்போதும் உங்களிடம் அதிக நேரம் இருக்கும். அதனால் இறுதி முடிவில் அதிக கவனம் செலுத்த வேண்டாம்’ என்று அவர் எனக்குக் கூறினார். எனவே இறுதி முடிவில் கவனம் செலுத்தாமல், செயல்முறையை மட்டும் பார்த்து, ஆட்டத்தை முடிந்தவரை பிரித்து ஆராய்ந்து, கடைசி நேரத்தில் பவுண்டரிகளை அடிப்பதற்கான வழிகளைக் கண்டறிய முயன்றேன்” என்று தோனி தனக்கு அளித்த முக்கிய ஆலோசனையைக் குறிப்பிட்டுள்ளார்.
மேலும் பேசிய அவர் “இந்திய அணி ஓவர்களில் பின்தங்கியிருந்ததையும் நான் கணக்கிட்டேன். அதனால் இறுதியில் அவர்கள் ஓரிரு ஃபீல்டர்களை 30-யார்டு சர்க்கிளுக்குள் கொண்டு வர நேரிடும் என்பதை அறிந்திருந்தேன். ஒரு ஸ்கோரை டிஃபென்ட் செய்ய முயலும் போது, 5 ஃபீல்டர்களை ரிங்கிற்குள் வைத்திருக்க வேண்டிய நிலை வருவது எப்போதுமே கடினம். பேட்டிங் செய்யும்போது இவை அனைத்தையும் நான் கணக்கிட்டேன். அதிர்ஷ்டவசமாக கடைசி நேரத்தில் அனைத்தும் எங்களுக்குச் சாதகமாக அமைந்தது” என்று கூறி முடித்தார்.
