இந்தியாவிற்கு எதிரான இரண்டாவது டெஸ்ட் போட்டியில் மேற்கிந்திய தீவுகள் அணியை இந்தியா 7 விக்கெட் வித்தியாசத்தில் வீழ்த்தி, 2-0 என்ற கணக்கில் தொடரை கைப்பற்றியது. இந்தப் போட்டியில் மேற்கிந்திய தீவுகளின் ஜான் கேம்ப்பெல் பற்றி முன்னாள் ஆல்-ரவுண்டர் ரவிச்சந்திரன் அஸ்வின் ஆச்சரியமூட்டும் கருத்தை தெரிவித்தார்.
மேற்கிந்திய தீவுகளின் பலத்தை எடுத்துக்காட்டிய அஸ்வின், கேம்ப்பெல் இந்தியாவின் முன்னணி வேகப்பந்து வீச்சாளர் ஜஸ்பிரீத் பும்ராவின் பந்துவீச்சை எதிர்கொண்ட விதத்தை பாராட்டினார். இந்தியாவில் வந்த வெளிநாட்டு பேட்ஸ்மேன்கள் யாரும் பும்ராவின் பந்துவீச்சை இவ்வளவு சிறப்பாக விளையாடியதில்லை என்று அவர் கூறினார்.
யாரும் பாராட்டவில்லை:
இருப்பினும், கேம்ப்பெல் ஒரு பிரபலமான வீரர் இல்லாததால் இது பெரிதாக பேசப்படாது என்று அவர் கருத்து தெரிவித்தார். இது குறித்து பேசிய அஸ்வின், “இந்த டெஸ்ட் போட்டியில், நான்காம் நாள் காலையில் ஜான் கேம்ப்பெல் அற்புதமான சதம் அடித்தார். பும்ராவின் அபாரமான பந்துவீச்சை அவர் சமாளித்த விதம் அற்புதமாக இருந்தது.”
“ஆஸ்திரேலியா, இங்கிலாந்து, நியூசிலாந்து அணிகளைச் சேர்ந்த வீரர்கள் கூட இந்தியாவில் பும்ராவை இவ்வளவு சிறப்பாக எதிர்கொண்டதில்லை. கேம்ப்பெல் அற்புதமாக ஆடினார். ஆனால் அவர் ஜான் கேம்ப்பெல் என்பதால் இது பெரிதாக பேசப்படாது. மேற்கிந்திய தீவுகளுக்கு திறன் உள்ளது. கேம்ப்பெலுக்கு டெஸ்ட் கிரிக்கெட் திறன் உள்ளது. ஆனால் அவர்களுக்கு அனுபவமும் பயிற்சியும் தேவை.பின்னர் அவர்கள் எல்லோருடனும் போட்டியிட முடியும்” என்று அஸ்வின் கூறினார்.
ஜான் கேம்ப்பெல் இரண்டாவது இன்னிங்ஸில் 199 பந்துகளில் 115 ரன்கள் எடுத்து சதம் அடித்தார். இதில் 12 பவுண்டரிகளும் மூன்று சிக்ஸர்களும் அடங்கும். விராட் கோலி, ரோஹித் ஷர்மா, சுப்மன் கில் போன்றவர்கள் பல வெளிநாட்டு சுற்றுப்பயணங்களில் பங்கேற்று, எதிர்பார்க்கப்படும் சூழ்நிலைகளை அறிந்தவர்கள் என்றும், தற்போதைய மேற்கிந்திய தீவுகள் அணிக்கு அந்த அனுபவம் இல்லை என்றும் அஸ்வின் சுட்டிக்காட்டினார்.
அஸ்வின் சொன்ன டிரிக்:
இதை தொடர்ந்து பேசிய அஸ்வின், “வெளிநாட்டு சுழற்பந்து வீச்சாளர்கள் கற்றுக்கொள்ள வேண்டும். ஆனால் சில நேரங்களில் அவர்கள் கற்றுக்கொள்ளும்போது தொடர் முடிந்துவிடும். முதலில் கற்றுக்கொள்ள வேண்டும், பின்னர் அதை செயல்படுத்த வேண்டும். ஐபிஎல்லில் வரும் பல சுழற்பந்து வீச்சாளர்கள், இந்தியாவில் என்ன செய்ய வேண்டும் என்று கேட்கிறார்கள்.”
இதையும் படிங்க: அகர்கருக்கு என்னை பத்தி அப்டேட் தரது என் வேலை இல்ல.. சர்ச்சைக்காக அமைதியாக இருக்கேன் – முகமது ஷமி வருத்தம்
“லெக் ஸ்டம்பில் பந்து வீச வேண்டும், சைட் ஸ்பின் கொடுக்க வேண்டும் என்று சொல்கிறேன். ஆனால் பலரால் அதை செய்ய முடியவில்லை. ஏனெனில் அது வேறு விதமான கிரிப். இதற்கு நேரம் தேவை, பயத்தை அகற்ற வேண்டும். மாற்றியமைக்க வேண்டும். ஒரு சுழற்பந்து வீச்சாளரின் பார்வையில் இதில் பல விஷயங்கள் உள்ளன” என்று அஸ்வின் கூறினார்.
