விதர்பாவின் இடது கை சுழற்பந்து வீச்சாளர் ஹர்ஷ் துபே, 2024-2025 ரஞ்சி கோப்பையில் மிகச்சிறந்த பங்களிப்பை வழங்கினார். 10 போட்டிகளில் 69 விக்கெட்டுகளை வீழ்த்திய அவர், 16.99 சராசரி வைத்திருந்தார். விதர்பா சாம்பியன் பட்டத்தை வெல்ல பெரும் பங்காற்றிய இவர், தனது 476 ரன்களுடன் பேட்டிங்கிலும் சிறப்பாக பங்களித்தார். இதனால், அவர் தொடர் நாயகனாக தேர்ந்தெடுக்கப்பட்டார்.
22 வயதான இவர், ஐபிஎல் 2025 இல் ஸ்மரன் ரவிச்சந்திரனுக்கு பதிலாக காயம் காரணமாக சன்ரைசர்ஸ் ஹைதராபாத் அணியால் 30 லட்ச ரூபாய்க்கு ஒப்பந்தம் செய்யப்பட்டார். பாட் கம்மின்ஸ் தலைமையிலான SRH அணியின் கடைசி மூன்று போட்டிகளில் விளையாடிய துபே, அந்த மூன்று போட்டிகளிலும் அணி வெற்றி பெற உதவினார்.
மே 25, ஞாயிற்றுக்கிழமை, கொல்கத்தா நைட் ரைடர்ஸ் அணிக்கு எதிரான போட்டியில் துபே சிறப்பாக பந்து வீசி, ரிங்கு சிங், ஆண்ட்ரே ரஸல், மற்றும் ராமன்தீப் சிங் ஆகிய மூன்று முக்கிய வீரர்களின் விக்கெட்டுகளை வீழ்த்தினார். 4 ஓவர்களில் 3/34 என்ற பந்து வீச்சு புள்ளியுடன், SRH 279 ரன்கள் என்ற பிரம்மாண்ட இலக்கை நிர்ணயித்து 110 ரன்கள் வித்தியாசத்தில் வெற்றி பெற்றது.
புத்திசாலித்தனமான வீரர் என பாராட்டு:
போட்டிக்குப் பின் செய்தியாளர்களிடம் பேசிய SRH தலைமை பயிற்சியாளர் டேனியல் விட்டோரி, துபேயின் புத்திசாலித்தனமான பந்து வீச்சையும், ஆடுகள நிலைமைகளைப் பயன்படுத்தும் திறனையும் பாராட்டினார்.”அவர் அணியில் இணைந்ததிலிருந்து செய்தவை குறித்து நாங்கள் மிகவும் மகிழ்ச்சியடைகிறோம். அவர் மிகவும் புத்திசாலித்தனமான பந்து வீச்சாளர்.
ஆடுகள நிலைமைகளை நன்கு புரிந்து, எவ்வாறு பந்து வீச வேண்டும் என்பதை அறிந்து, திறம்பட மாறுபாடுகளைப் பயன்படுத்துகிறார். எங்களுக்கு தேவையான கட்டுப்பாட்டை அவர் மூன்று போட்டிகளிலும் வழங்கியுள்ளார்,” என்று விட்டோரி கூறினார்.
துபேவுக்கு நல்ல எதிர்காலம்:
“துபேக்கு மிகச்சிறந்த விஷயம் என்னவென்றால், இப்போதும் அடுத்த ஐபிஎல் வரை, இந்தியா A அல்லது அவரது உள்நாட்டு அணிக்காக நிறைய கிரிக்கெட் விளையாடுவார். அவருக்கு ஏராளமான வாய்ப்புகள் இருக்கும், மேலும் அவர் ஒரு பந்து வீச்சாளராக மட்டுமல்ல, பேட்ஸ்மேனாகவும் தொடர்ந்து வளர முடியும் என்று நாங்கள் நம்புகிறோம். இது எங்கள் முடிவெடுப்பதில் முக்கியமான பகுதியாக இருந்தது,” என்று விட்டோரி கூறினார்.
இதையும் படிங்க: வரலாற்றில் முதல் முறை.. இந்தியா இங்கிலாந்து டெஸ்ட் தொடர் ஒளிபரப்பில் மாற்றம்.. எந்த சேனலில் பார்க்கலாம்?
துபே தனது முதல் ஐபிஎல் 2025 சீசனில் மூன்று போட்டிகளில் 5 விக்கெட்டுகளுடன் 19.60 சராசரியில் முடித்தார். அவர் இப்போது இந்தியா A அணியுடன் இணைந்து, இங்கிலாந்து லயன்ஸ் அணிக்கு எதிராக இரண்டு முதல் தர போட்டிகளிலும், இந்திய அணிக்கு எதிராக மே 30, வெள்ளிக்கிழமை தொடங்கும் மற்றொரு போட்டியிலும் விளையாடவுள்ளார்.
