இந்தியா–இலங்கை இடையிலான போட்டிகளில் வீரர்களுக்கு இடையேயான வார்த்தைப் போர் தற்போது கவனம் பெற்றுள்ளது. களத்தில் வீரர்கள் ஒருவரை ஒருவர் சீண்டுவது கிரிக்கெட்டில் புதிதல்ல என்றாலும், அது எல்லையைத் தாண்டிவிடக் கூடாது என இந்திய அணியின் முன்னாள் ஆல்ரவுண்டர் தெரிவித்துள்ளார்.
சமீபத்திய போட்டியில் ஜெய்ஸ்வால் களத்தடுப்பில் இருந்தபோது இலங்கை வீரர் நிரோஷன் டிக்வெல்லாவிடம் சில வார்த்தைகளைப் பேசியதாக கூறப்படுகிறது. இதுபோன்ற கிண்டல் மற்றும் வார்த்தைப் போர் கிரிக்கெட்டில் இருக்கலாம் என்றும், ஆனால் அதில் தவறான வார்த்தைகள் அல்லது தனிப்பட்ட முறையிலான தாக்குதல்கள் இடம்பெறக் கூடாது என்றும் அவர் குறிப்பிட்டார்.
“இது ஆபத்தான எல்லைதான். அதில் எந்த சந்தேகமும் இல்லை. உடல் ரீதியான மோதல் என்பது வேறு விஷயம். கடந்த போட்டியில் ஜெய்ஸ்வால் மறுபுறம் இருந்தார். அவர் டிக்வெல்லாவிடம் சில விஷயங்களைச் சொன்னார். வார்த்தைப் போர் தவறில்லை; ஆனால் அதில் தவறான மொழி இருக்கக்கூடாது என்று நாங்கள் கூறினோம்,” என்று அவர் தெரிவித்தார்.
மேலும், “ஒருவரால் தன்னைப் பார்த்து சிரிக்க முடியவில்லை என்றால், மற்றவர்களைப் பார்த்து சிரிக்கக் கூடாது. நீங்கள் மற்றவர்களிடம் சொல்லும் விஷயங்களை, அவர்கள் உங்களிடம் திருப்பிச் சொன்னாலும் அதை ஏற்றுக்கொள்ள முடியும் என்றால் மட்டுமே களத்தில் சொல்லுங்கள்,” என்றும் அவர் எச்சரித்துள்ளார்.
