நியூசிலாந்துக்கு எதிரான ஒருநாள் தொடர்.. இந்திய அணியில் யாருக்கு எல்லாம் இடம் கிடைக்கும்

நியூசிலாந்துக்கு எதிரான மூன்று போட்டிகள் கொண்ட ஒருநாள் தொடருக்கான இந்திய அணியை பிசிசிஐ தேர்வுக் குழு அறிவிக்க உள்ளது. 2026 ஆம் ஆண்டை நியூசிலாந்துக்கு எதிரான இந்த உள்ளூர் தொடருடன் இந்திய ஆண்கள் கிரிக்கெட் அணி தொடங்குகிறது. ஜனவரி 11, 14, 18 ஆகிய தேதிகளில் வதோதரா, ராஜ்கோட், இந்தூர் ஆகிய நகரங்களில் 3 ஒருநாள் போட்டி நடைபெற உள்ளது.காயம் காரணமாக நவம்பர்-டிசம்பர் 2025-இல் தென் ஆப்பிரிக்காவுக்கு எதிரான தொடரைத் தவறவிட்ட கேப்டன் சுப்மன் கில் இந்தத் தொடரில் மீண்டும் அணிக்குத் திரும்புகிறார்.

தற்போது உடற்தகுதி பெற்று முழுமையாகத் தயாராக உள்ள கில், இந்திய ஒருநாள் அணியை வழிநடத்துவார்.
ஆஸ்திரேலியாவுக்கு எதிராக அக்டோபர் 2025-இல் கில் தலைமையில் நடந்த ஒருநாள் தொடரில் இந்தியா மூன்று போட்டிகளில் இரண்டில் தோற்றது. இந்தத் தொடரை வென்று தனது முதல் தொடர் வெற்றியைப் பதிவு செய்ய அவர் ஆர்வமாக இருப்பார். கில் அணிக்குத் திரும்புவது யஷஸ்வி ஜெய்ஸ்வாலுக்கு சாதகமாக இருக்காது.

தென்னாப்பிரிக்காவுக்கு எதிரான தொடரில் கில் இல்லாத நிலையில் தொடக்க ஆட்டக்காரராகக் களமிறங்கிய ஜெய்ஸ்வால், விசாகப்பட்டினத்தில் டிசம்பர் 6-ஆம் தேதி நடந்த மூன்றாவது ஒருநாள் போட்டியில் ஒரு சதம் அடித்து ஆட்டமிழக்காமல் இருந்தார். இருப்பினும் கில் திரும்புவதால், அவர் மீண்டும் பெஞ்சில் அமரவே வாய்ப்புள்ளது.

திரும்பும் ஸ்டார் வீரர்கள்:

உலகின் நம்பர் 1 ஒருநாள் பேட்ஸ்மேன் ரோஹித் சர்மா மற்றும் நம்பர் 2 ஒருநாள் பேட்ஸ்மேன் விராட் கோலி ஆகியோர் நியூசிலாந்து தொடருக்கான அணியில் இடம்பெறுவது உறுதி. காயம் அடைந்த ஷ்ரேயாஸ் ஐயருக்கும் அணியில் இடம் கிடைக்க சிறிதளவே வாய்ப்புள்ளது. ஐயர் சேர்க்கப்பட்டாலும், தென் ஆப்பிரிக்காவுக்கு எதிராக நான்காம் வரிசையில் சதம் அடித்த ருதுராஜ் கெய்க்வாட் தனது இடத்தைத் தக்கவைத்துக் கொள்வார்.

கே.எல். ராகுல் இந்தியாவின் முதல் தேர்வு விக்கெட் கீப்பர்-பேட்ஸ்மேன் என்பதுடன், நியூசிலாந்துக்கு எதிராகவும் விக்கெட் கீப்பராக செயல்படுவார். அவருக்கு மாற்று விக்கெட் கீப்பராக யார் வருவார் என்ற கேள்வி எழுந்துள்ளது. ரிஷப் பண்ட் நியூசிலாந்து ஒருநாள் தொடரில் தேர்வு செய்யப்பட மாட்டார் என்றும், அவருக்குப் பதிலாக இஷான் கிஷன் சேர்க்கப்படலாம் என்றும் தகவல்கள் தெரிவிக்கின்றன.

பும்ராவுக்கு ஓய்வு

தென் ஆப்பிரிக்கா ஒருநாள் தொடரில் ஓய்வளிக்கப்பட்ட ஹர்திக் பாண்டியா மற்றும் ஜஸ்பிரித் பும்ரா ஆகியோர் நியூசிலாந்து ஒருநாள் தொடரிலும் ஓய்வெடுப்பார்கள் என்று எதிர்பார்க்கப்படுகிறது. குல்தீப் யாதவ், ரவீந்திர ஜடேஜா, வாஷிங்டன் சுந்தர், ஹர்ஷித் ராணா மற்றும் அர்ஷ்தீப் சிங் ஆகியோர் அணியில் இடம்பெறுவது உறுதியாகி உள்ளது. தென் ஆப்பிரிக்காவுக்கு எதிரான 50 ஓவர் போட்டிகளுக்கு புறக்கணிக்கப்பட்ட முகமது சிராஜை இணைப்பார்களா என்பது சுவாரஸ்யமாக இருக்கும்.

இதையும் படிங்க: டி20 உலககோப்பைக்கான ஆஸ்திரேலிய அணி.. 2 ஸ்டார் பவுலர்கள் அணியில் சேர்க்கப்பட வாய்ப்பு

நியூசிலாந்து ஒருநாள் தொடருக்கான இந்தியாவின் உத்தேச அணி: சுப்மன் கில் (கேப்டன்), ரோஹித் சர்மா, யஷஸ்வி ஜெய்ஸ்வால், விராட் கோலி, ருதுராஜ் கெய்க்வாட், ஷ்ரேயாஸ் ஐயர், கே.எல். ராகுல் (விக்கெட் கீப்பர்), இஷான் கிஷன் (விக்கெட் கீப்பர்), ரவீந்திர ஜடேஜா, வாஷிங்டன் சுந்தர், குல்தீப் யாதவ், ஹர்ஷித் ராணா, அர்ஷ்தீப் சிங், முகமது சிராஜ், பிரசித் கிருஷ்ணா.