இலங்கைக்கு எதிரான இரண்டாவது டெஸ்ட் போட்டியில் 58 ரன்கள் மற்றும் இன்னிங்ஸ் வித்தியாசத்தில் வெற்றி பெற்று டெஸ்ட் தொடரை 2-0 என ஒயிட் வாஷ் செய்திருக்கிறது நியூசிலாந்து அணி.
நியூசிலாந்து சென்று இரண்டு டெஸ்ட் போட்டிகள் கொண்ட தொடரில் விளையாடியது இலங்கை அணி. முதல் டெஸ்ட் போட்டியில் பரபரப்பு உச்சத்தை பெற்று, கடைசியில் இரண்டு விக்கெட்டுகள் வித்தியாசத்தில் நியூசிலாந்து அணி வெற்றி பெற்றது.
இரண்டாவது டெஸ்ட் போட்டி வெலிங்டன் மைதானத்தில் நடைபெற்றது. இதில் முதலில் பேட்டிங் செய்த நியூசிலாந்து அணி 580 ரன்கள் அடித்து 4 விக்கெட்டுகளை இழந்திருந்தபோது டிக்ளர் செய்தது. பின்னர் முதல் இன்னிங்சில் விளையாடிய இலங்கை அணி 164 ரன்கள் ஆல் அவுட் ஆனது. கேப்டன் கருணரத்னே மட்டுமே 89 ரன்கள் அடித்திருந்தார்.
பாலோவ் ஆன் கொடுக்கப்பட்டு, இரண்டாவது இன்னிங்சில் தொடர்ந்து பேட்டிங் செய்தது இலங்கை அணி. மூன்றாம் நாள் முடிவில் இரண்டு விக்கெட் இழப்பிற்கு 113 ரன்கள் அடித்திருந்தது. 303 ரன்கள் பின்தங்கிய நிலையில் இருந்தது.
4ம் நாள் ஆட்டத்தை துவங்கிய இலங்கை அணி, இன்னிங்ஸ் தோல்வியை தவிர்ப்பதற்கு இன்று போராடியது. குஷால் மண்டிஸ் 50 ரன்கள் அடித்து ஆட்டம் இழந்தார். 114 ரன்கள் இழந்திருந்த போது, ஐந்தாவது விக்கெட்டுக்கு சந்திமால் மற்றும் தனஞ்செயா இருவரும் பார்ட்னர்ஷிப் அமைத்தனர். இந்த ஜோடி 126 ரன்கள் சேர்த்தது. சந்திமால் 62 ரன்களுக்கு அவுட் ஆனார்.
பின்னர் வந்த நிஷன் சிறிது நேரம் பார்ட்னர்ஷிப் அமைத்து 39 ரன்களுக்கு அவுட் ஆனார். இன்னொரு முனையில் அபாரமாக விளையாடி வந்த தனஞ்செயா துரதிஷ்டவசமாக 98 ரன்களுக்கு ஆட்டமிழக்க, ஒரு கட்டத்தில் நல்ல முன்னிலை வைக்கும் என்று எதிர்பார்க்கப்பட்ட இலங்கை அணிக்கு, கீழ் வரிசையில் வந்த வீரர்கள் அடுத்தடுத்து ஆட்டம் இழந்தனர்.
இறுதியில் இரண்டாம் இன்னிங்சில் 358 ரன்களுக்கு இலங்கை அணி ஆல் அவுட் ஆனது. இதனால் 58 ரன்கள் மற்றும் இன்னிங்ஸ் வித்தியாசத்தில் தோல்வியையும் தழுவியது. இரண்டு டெஸ்ட் போட்டிகள் கொண்ட இந்த தொடரை 2-0 என கைப்பற்றி நியூசிலாந்து அணி ஒயிட்-வாஷ் செய்திருக்கிறது.
200 ரன்கள் அடித்து இறுதிவரை ஆட்டம் இழக்காமல் இருந்த ஹென்றி நிக்கோல்ஸ் ஆட்டநாயகனாகவும், கடந்த போட்டியில் சதம் இந்த போட்டியில் இரட்டை சதமடித்து அசத்திய கேன் வில்லியம்சன் தொடர் நாயகனாகவும் தேர்வு செய்யப்பட்டனர்.
