நியூசிலாந்து அணிக்கு எதிரான டி20 தொடரில் வேகப்பந்து வீச்சாளர் புவ்னேஷ்வர் குமாரை பிளேயிங் லெவனில் தொடர்ந்து விளையாட வைப்பது குறித்து முன்னாள் இந்திய ஆல்ரவுண்டர் இர்பான் பதான் தனது கருத்தைத் தெரிவித்துள்ளார்.
இந்திய அணிக்கு மீண்டும் திரும்பியுள்ள புவ்னேஷ்வர் குமார், முதல் இரண்டு போட்டிகளில் பெரிதாக சோபிக்காத நிலையில் அவரை அணியிலிருந்து நீக்க வேண்டும் என்ற பேச்சுக்கள் எழுந்தது குறித்து அவர் பேசியுள்ளார்.
முன்னாள் வீரரான இர்பான் பதான், ஒரு சீனியர் வீரரைத் தேர்வு செய்துவிட்டு அவரை வெளியில் அமரவைப்பது சரியாக இருக்காது என்று சுட்டிக்காட்டியுள்ளார்.
அணியில் உள்ள இளம் பந்துவீச்சாளர்கள் கடினமான சூழ்நிலைகளில் விளையாடி தங்களை நிரூபிக்க வேண்டும் என்று விரும்பினாலும், மூத்த வீரருக்குத் தொடர்ந்து வாய்ப்பளிக்க வேண்டும் என்பதில் அவர் உறுதியாக இருக்கிறார்.
இரண்டாவது டி20 போட்டியில் புவ்னேஷ்வர் குமார் ஒரு விக்கெட்டைக் கைப்பற்றினாலும், வைட்கள் மற்றும் நோ-பால் வீசி ஓரளவு ரன்களை விட்டுக் கொடுத்தார். இருப்பினும், தொடரின் மீதமுள்ள போட்டிகளிலும் அவருக்கு வாய்ப்பளித்து அவரை முழுமையாகப் பயன்படுத்த வேண்டும் என்று பதான் வலியுறுத்தியுள்ளார்.
இதுகுறித்து இர்பான் பதான் பேசும்போது, “பாருங்கள், நீங்கள் ஒரு சீனியர் வீரரைக் கொண்டு வந்திருக்கிறீர்கள், எனவே அவரை அனைத்து போட்டிகளிலும் விளையாட வைக்க வேண்டும். தனிப்பட்ட முறையில் எத்தனை இளம் வேகப்பந்து வீச்சாளர்கள் அணிக்குள் வருகிறார்கள், அவர்கள் எப்படி விளையாடுகிறார்கள் என்பதைப் பார்க்க நான் விரும்புகிறேன். அவர்கள் எவ்வளவு அதிகமாக விளையாடுகிறார்களோ, சுற்றுப்பயணம் எவ்வளவு கடினமாக இருக்கிறதோ, அவ்வளவு நல்லது. ஆனால் நீங்கள் ஒரு சீனியர் வீரரைத் தேர்ந்தெடுத்து இருக்கிறீர்கள். அவரை வெளியே வைப்பதற்காக நீங்கள் தேர்ந்தெடுக்கவில்லை” என்று கூறி இருக்கிறார்.