ஜிம்பாப்வே அணிக்கு எதிரான டி20 தொடருக்கான இந்திய அணித் தேர்வு குறித்து முன்னாள் இந்திய வீரர் ஹனுமா விஹாரி பல கேள்விகளை எழுப்பியுள்ளார். குறிப்பாக, ரஜத் படிதார் அணியில் இடம்பெறாதது குறித்து பேசிய அவர், தேர்வுக்குழுவின் முடிவுகள் குறித்து தனது அதிருப்தியை வெளிப்படுத்தியுள்ளார்.
ரிங்கு சிங்கை மீண்டும் அணிக்குள் கொண்டு வந்த நிலையில், சிறப்பான ஆட்டத்தை வெளிப்படுத்திய ராஜத் படிதாருக்கு ஏன் வாய்ப்பு வழங்கப்படவில்லை என்று விஹாரி கேள்வி எழுப்பினார். ஐபிஎல் போட்டிகளில் கேப்டனாகவும் பேட்டராகவும் சிறப்பாக செயல்பட்ட ஒரு வீரருக்கு வாய்ப்பு கிடைக்காதது புரியாத முடிவு என்றும் அவர் கூறியுள்ளார்.
“அணியில் இத்தனை இடதுகை பேட்டர்கள் இருக்கிறார்கள்… இன்னொரு வலதுகை பேட்டர் தேவை”
ஜிம்பாப்வே டி20 அணியின் பேட்டிங் வரிசை குறித்து பேசிய விஹாரி, அணியில் அதிகமான இடதுகை பேட்டர்கள் இருப்பதாக சுட்டிக்காட்டினார். அதனால் ரஜத் படிதார் அல்லது சஞ்சு சாம்சன் போன்ற வலதுகை பேட்டர்களில் ஒருவருக்கு வாய்ப்பு வழங்கியிருக்கலாம் என்று அவர் தெரிவித்தார்.
மேலும், பிரப்ஸிம்ரன் சிங் அணியில் சேர்க்கப்பட்டிருப்பது குறித்து பேசிய அவர், விக்கெட் கீப்பர் இடத்தில் இஷான் கிஷன் முதல் தேர்வாக இருப்பார் என்பதால் பிரப்ஸிம்ரனுக்கு வாய்ப்பு கிடைக்குமா என்பது கேள்வியாக இருப்பதாக கூறினார். வீரர்களின் திறமை மற்றும் அணியின் தேவையை கருத்தில் கொண்டு தேர்வு செய்ய வேண்டும் என்றும் அவர் வலியுறுத்தினார்.
ரஜத் படிதார் மட்டுமின்றி, குல்தீப் யாதவ் மற்றும் சஞ்சு சாம்சன் போன்ற வீரர்கள் தேர்வு செய்யப்படாதது குறித்தும் ஹனுமா விஹாரி கேள்வி எழுப்பினார். ஐபிஎல் போன்ற பெரிய தொடரில் தொடர்ந்து செயல்படும் வீரர்களுக்கு வாய்ப்பு கிடைக்க வேண்டும் என்பதே அவரது கருத்தின் முக்கிய அம்சமாக இருந்தது.
