மேற்கிந்தியத் தீவுகளுக்கு எதிரான மூன்றாவது டி20 போட்டியில் இந்திய அணி வெற்றி பெற்றதைத் தொடர்ந்து, தொடரைக் கைப்பற்றியதும் இளம் வீரர் வைபவ் சூரியவன்ஷிக்கு வாய்ப்பளிக்க வேண்டும் என்று முன்னாள் இந்திய ஆல்ரவுண்டர் அபிஷேக் நாயர் கருத்து தெரிவித்துள்ளார். இந்தத் தொடரில் தொடக்க ஆட்டக்காரர்களாக அபிஷேக் சர்மா மற்றும் சஞ்சு சாம்சன் களம் இறங்கி வரும் வேளையில், இளம் வீரர் சூரியவன்ஷி இன்னும் வாய்ப்பு பெறாமல் பெஞ்ச்சில் உள்ளார்.
மூன்றாவது போட்டியில் தொடக்கத்தில் நிதானமாக ஆடிய அபிஷேக் சர்மா, ரோஸ்டன் சேஸ் பந்துவீச்சில் அதிரடியாக ரன்களைக் குவித்து 30 பந்துகளில் 69 ரன்கள் விளாசி அணியின் வெற்றிக்கு முக்கியப் பங்காற்றினார். அபிஷேக் சர்மாவின் இந்த அதிரடி பேட்டிங் அப்ரோச்சை முன்னாள் வீரர் நாயர் வெகுவாகப் பாராட்டியுள்ளார்.
அடுத்த இரண்டு போட்டிகளுக்கான திட்டம் குறித்து அபிஷேக் நாயர் பேசும்போது “இந்திய அணி 3-1 என முன்னிலை பெற்று தொடரை உடனடியாகக் கைப்பற்ற வேண்டும் என்று நான் விரும்புகிறேன், மேலும் கடைசி போட்டியில் சூரியவன்ஷி விளையாட வேண்டும். எனவே எளிமையாகச் சொல்வதானால்: 3-1 என முன்னிலை பெற்று தொடரை முடியுங்கள், கடைசி போட்டியில் சூரியவன்ஷியை விளையாட விடுங்கள்” என்று கூறி இருக்கிறார்.
அபிஷேக் சர்மாவின் பேட்டிங் குறித்து பேசும்போது “உங்களுக்கு நீங்களே நேரம் கொடுப்பது, பந்துவீச்சாளர்களை எப்படி எதிர்கொள்வது என்பதற்கான ஆயத்தமாகும். ஒவ்வொரு பந்தையும் எதிர்கொள்ளும்போது பந்துவீச்சாளரின் திட்டங்களை நீங்கள் புரிந்து கொள்கிறீர்கள். அபிஷேக் ஆறு பந்துகளைச் சந்தித்தவுடன், பந்துவீச்சாளரான ரோஸ்டன் சேஸ் அவரைத் தொடர ஆரம்பித்தார். அபிஷேக்கிற்கு ஒரு பெயர் இருக்கிறது, சேஸும் அந்தப் பெயருக்கு ஏற்றவாறே பந்துவீசுகிறார். எனவே அந்த 6 பந்துகளை விளையாடிய பிறகு அவர் உங்களை பின் தொடரப் போகிறார்” என்று கூறி இருக்கிறார்.
மேலும் ஆட்டத்தின் நுணுக்கங்கள் குறித்து பேசும்போது “போட்டிக்குள் ஒரு போட்டி இருக்கிறது. நீங்கள் ஒருவரை இரண்டு முறை அவுட் செய்திருக்கலாம், ஆனால் அபிஷேக் அந்த 5 முதல் 6 பந்துகளை எதிர்கொண்ட பிறகு, அபிஷேக் அடுத்து என்ன செய்யப் போகிறார் என்பதை அவர் ஊகிக்கத் தொடங்குகிறார், ஏனெனில் ஒரு ஆஃப்-ஸ்பின்னராக நீங்கள் வீசப்போகும் அனைத்து வேரியேஷன்களையும் அவருக்குக் காட்டிவிட்டீர்கள். அதுதான் அபிஷேக் சர்மாவை ஸ்பெஷலாக மாற்றுகிறது. அவரால் முதல் பந்திலிருந்தே அதிரடியைத் தொடங்க முடியும், தேவைப்பட்டால் நேரமெடுத்து எதிரணியை பிரஷரில் தள்ளவும் முடியும்” என்று கூறி இருக்கிறார்.
