ஆப்கானிஸ்தானுக்கு எதிரான முதல் டி20 போட்டியில் இந்திய அணி 7 விக்கெட் வித்தியாசத்தில் வெற்றி பெற்றாலும், அணியில் இருக்கும் ஒரு முக்கியமான குறையை முன்னாள் வீரர் வாசிம் ஜாஃபர் சுட்டிக்காட்டியுள்ளார். குறிப்பாக ஹார்திக் பாண்டியா இல்லாத நேரத்தில் இந்திய அணியின் 5-வது பந்துவீச்சாளர் யார் என்ற கேள்வி இன்னும் தீர்க்கப்படாமல் இருப்பதாக அவர் தெரிவித்துள்ளார்.
இந்த போட்டியில் நிதிஷ் குமார் ரெட்டி 2 ஓவர்களில் 30 ரன்களையும், சிவம் துபே 2 ஓவர்களில் 21 ரன்களையும் விட்டுக்கொடுத்தனர். அபிஷேக் சர்மாவும் பந்துவீச பயன்படுத்தப்பட்டார். இதில் அபிஷேக் ஓரளவு சிறப்பாக செயல்பட்டாலும், நிதிஷ் மற்றும் துபே அதிக ரன்களை கொடுத்தது இந்திய அணியின் பந்துவீச்சு சமநிலை குறித்து கேள்வியை எழுப்பியுள்ளது.
இதுகுறித்து வாசிம் ஜாஃபர் கூறுகையில், “5-வது பந்துவீச்சாளர் இடம்தான் கவலைக்குரிய விஷயமாக இருக்கிறது. நிதிஷ் ரெட்டி மற்றும் சிவம் துபே அதிக ரன்களை கொடுத்தனர். ஹார்திக் பாண்டியா இல்லாதபோது இது பிரச்சினையாக இருக்கும். உலகக் கோப்பையை கருத்தில் கொண்டு 5-வது அல்லது 6-வது பந்துவீச்சாளர்கள் மீது இந்தியா கவனம் செலுத்த வேண்டும்” என்று தெரிவித்துள்ளார்.
